Təhsil nazirinin müavini Məhəbbət Vəliyeva Masallıda

Təhsil nazirinin müavini Məhəbbət Vəliyeva cənub bölgəsinə səfəri çərçivəsində Masallı rayonunda olub.

Təhsil nazirinin müavini Məhəbbət Vəliyeva tədris ocaqlarının vəziyyəti ilə tanış olub, təhsil işçiləri, şagird və valideynlərlə görüşüb. Öncə rayonun Şıxlar kəndində tikintisi davam edən modul tipli məktəbə baxış keçirən nazir müavini sonra Qəriblər kənd tam orta məktəbində olub.
Məhəbbət Vəliyeva Masallı şəhər “Dəfinə” məktəb-liseyində müəllimlərin dərsdən sonra şagirdlərlə təmənnasız məşğul olmalarını yüksək qiymətləndirib, bunun əsl müəllim və vətəndaş mövqeyi olduğunu deyib. Belə halların Masallının digər məktəblərində də həyata keçirildiyindən məlumatlı olduğunu bildirib.
Nazir müavini Masallı şəhər 4 nömrəli Digah tam orta məktəbdə rayonun təhsil uğurları ilə tanış olub, idmançı məktəblilərlə görüşüb. Valideynlərlə söhbət edən Məhəbbət Vəliyeva onların təkliflərini dinləyib, valideyn-məktəb işbirliyinin vacibliyindən danışıb. Sonra nazir müavini həmin məktəbdə rayonda yerləşən təhsil müəssisələrinin rəhbərləri ilə görüşüb. Görüşdə bir sıra məsələlər müzakirə edilib.
Məhəbbət Vəliyeva, eyni zamanda, rayonun Uşaq-Gənclər İnkişaf Mərkəzində olub, mərkəzin kollektivi ilə görüşüb.