Masallıda “Xəmsə” Milli İntellektual oyunu üzrə rayon seçim turu

24-25 oktyabr 2019-cu il tarixlərdə Masallı rayon Gənclər və İdman İdarəsinin və Təhsil şöbəsinin birgə təşkilatçılığı ilə Gənclər Mərkəzində yeniyetmələr arasında “Xəmsə” Milli İntellektual Oyunu üzrə rayon seçim turu keçirilib

Tədbirdə çıxış edən Masallı Rayon Gənclər və İdman İdarəsinin rəisi Camal Manafov xüsusilə vurğulamışdır ki, bu gün Azərbaycan Respublikasının Prezidenti cənab İlham Əliyevin gənclərlə bağlı imzaladığı sərəncamlar, qəbul etdiyi dövlət proqramları gənclərin hərtərəfli inkişafına yönəlib. O söylənilənlərin əyani göstəricisi kimi cənab Prezidentin gənclərlə bağlı etdiyi çıxışlarda gənclərin intellektual səviyyəsinin yüksəldilməsi və hərbi vətənpərvərlik ruhunda tərbiyələndirilməsi ilə bağlı önə çəkdiyi məsələləri və “Azərbaycan gəncliyi 2017–2021-ci illərdə” Dövlət Proqramının təsdiq edilməsi haqqında növbəti Sərəncamını sadalayıb.

Tədbirdə Masallı rayon Təhsil şöbəsinin metodisti Abbas Abbaszadə çıxış edərək bildirdi ki, təşkil edilən bu kimi yarışmalar yeniyetmə və gənclərin intellektual bilik səviyyəsinin yüksəldilməsi və istedadlı gənclərin aşkara çıxarılmasına, bilik və məlumat bazalarının möhkəmləndirilməsinə, ümumilikdə isə hərtərəfli inkişafına xidmət etdiyini deyib.

Daha sonra yarışmaya start verilib. Yarışmada hər komandanın tərkibində 5 nəfər olmaqla, ümumilikdə 80 nəfər yeniyetmə mübarizəyə qoşulub.Maraqlı mübarizə şəraitində keçən yarışda S.Rzayev adına Böyük Kolatan kənd tam orta məktəbinin yeniyetmələrdən ibarət “Vendetta” komandası birinci yerə, Bala Kolatan kənd tam orta məktəbinin yeniyetmələrdən ibarət “Big Bang” komandası ikinci yerə, Şəhər 6 nömrəli tam orta məktəbin “Ulduz” komandası isə üçüncü yerə layiq görülmüşdür.

Yarışda qalib gəlmiş komandalar Masallı rayon Gənclər və İdman İdarəsi və Təhsil şöbəsinin diplomları ilə mükafatlandırılıb