Masallı rayon Əmirtürbə kəndində şəhid Səfərəli Alışovun adı əbədiləşdi

09 noyabr 2019-cu il tarixdə “Azərbaycan Sərhəd Mühaizəsinin 100 illiyi” və “Hərbi əməkdaşlıq sahəsindəki xidmətlərə görə” medallı şəhid Səfərəli Alışovun  40 mərasimi və adına verilmiş küçənin açılışı keçirilib. Bu münasibətlə keçirilən tədbirdə Masallı Rayon İcra Hakimiyyətinin başçısı cənab Rafil Hüseynov və aparatı, Dövlət Sərhəd Xidməti rəisinin müavini, general-leytenant Azad Ələkbərov, hüquq mühafizə orqanları rəhbərləri, rayonun ziyalıları, ağsaqqalları, DSX-nin Sərhəd Qoşunlarının əsgər və zabitləri, ictimaiyyət nümayəndələri iştirak ediblər.

İcra başçısı Rafil Hüseynov və general-leytenant Azad Ələkbərov çıxış edərək şəhidimizin hünər yolundan danışmış, şəhidin adının əbədiləşdirilməsi məqsədi ilə kəndin mərkəzi küçəsinə onun adı verilmiş və şəhidin adını bildirən küçənin barelyefini açıb.
Tədbirdə hüquq mühafizə orqanları rəhbərləri, ağsaqqallar, ziyalılar, ictimaiyyət nümayəndələri və yüzlərlə sakin iştirak etmiş, guşəyə təzə tər dəstələri düzərək şəhidin xatirəsini ehtiramla yad ediblər.
Mərasim bu günlərdə şəhidin şərəfinə əsaslı təmirdən sonra istifadəyə verilmiş Əmirtürbə kənd məktəbində davam etdirilib. Məktəbdə böyük izdiham yaşanıb. Sinif otaqlarına baxış keçirilib. "Prezident Masallıda", "Azərbaycanın Milli Qəhrəmanları", şəhidlər ölməz", güllütəpəli Aprel şəhidi Firdövsi Bağırzadəyə həsr olunmuş stendlərə baxıblar.
Sonra tədbir iştirakçıları əvvəlcə şəhidin doğulduğu evə baş çəkib, uyuduğu məzarı ziyarət ediblər.
Çıxışlarda bildirilib ki, Səfərəli Abışov düşmənlə təmas xəttinə yaxın ərazilərdəki mövqelərimizdə ekskavatorçu kimi təminat yollarının salınması ilə məşğul olub. Əməyini sevib, hamının hörmətini qazanıb. İşlədiyi müddətdə dəfələrlə düşmən atəşinə tutulub. Amma, düşmən hiyləsindən, düşmən gülləsindən qorxmayıb. Bir gün - 2 oktyabr saat 16:55 radələrində Qazax rayonunun Quşçu Ayrım kəndi istiqamətində, iş başında olan Səfərəli Alışov düşmən tərəfindən vurulub, ağır güllə yarası alıb. Buna əhəmiyyət verməyən Səfərəli işini cəsarətlə davam etdirməyə səy edib. Hadisə yerində dərhal mümkün tibbi yardım göstərilib yaralının təcili təxliyəsi təmin olunsa da, onun həyatını xilas etmək mümkün olmayıb...
İndi onun haqqında hamı danışır. O, təkcə doğulduğu, boy atdığı torpağın, Masallının yox, bütün Azərbaycanın igid oğludur.
Natiqlər Azərbaycan Ordusunun nailiyyətlərindən danışıb, şəhidə Allahdan rəhmət diləyiblər. Şıxışçılar sərhədçi dilində Səfərəlinin kəndini "əmirtürbə postu" adlandırıblar.
Şəhdin uyuduğu Əmirtürbə kənd qəbiristanlığında da böyük izdiham yaşanıb. Məzarı gül-çiçəyə bürünüb, əklillər düzülüb.Ruhuna dualar oxunub, ehsan verilib. Məzarı başında əmirtürbəli məktəblilər Vətəni, ölkəmizi vəsf edən şeirlər söyləyiblər.
Natiqlər şəhidin ailəsinə dərin hüznlə başsağlığı verib, bildiriblər ki, torpaqlarımızın müdafiəsi uğrunda şəhid olmuş soydaşlarımızın qisası yerdə qalmayacaq. Tezliklə Azərbaycanıən üçrəngli Bayrağı Şuşada, Qarabağda, işğal altında olan digər ərazilərimizdə dalğlanacaq. Hamı Prezident, Ali Baş Komandan cənab İlham Əliyevin ətrafında sıx birləşib.
Qeyd edək ki, Azərbaycan-Ermənistan dövlət sərhəddində təmas xəttində yerləşən Dövlət Sərhəd Xidmətinin Sərhəd Qoşunlarının “Qazax” əlahiddə sərhəd diviziyasının sərhəd döyüş mövqelərinə qarşı düşmən tərəfinin təxribatı nəticəsində 1958-ci il təvəllüdlü  Səfərəli Ələkbər oğlu Alışov bu ilin 3 oktyabrında anadan olduğu Masallı rayonu Güllütəpə ərazisinin Əmirtürbə kəndində  torpağa tapşırılmışdır. Bu gün Səfərəlinin toprağa tapşırılmasından 40 gün keçir. Onun xatirəsi ehtiramla yad edilir...