“Şahinlər” Hərbi-idman oyunlarının rayon birinciliyi

02 aprel 2014-cü il tarixdə Masallı  rayon Gənclər və İdman idarəsinin təşkilatçılığı, Təhsil şöbəsinin iştirakı ilə Masallı şəhər 3 saylı tam orta məktəbdə Gənclərin hərbi vətənpərvərlik tərbiyəsinin gücləndirilməsində, onların fiziki hazırlıqlarının artırılmasında, həmçinin ordu sıralarına hazırlanmasında  müstəsna əhəmiyyəti olan “Şahinlər” hərbi-idman oyunlarının rayon birinciliyi keçirilmişdir

         Yarışın açılış mərasimində Masallı rayon Gənclər və İdman İdarəsinin rəisi Camal Manafov çıxış edərək komandaları salamlamış və “Şahinlər” hərbi - idman oyununun keçirilməsində məqsədin yeniyetmələrlə aparılan hərbi vətənpərvərlik tərbiyəsi işini daha da gücləndirmək, orta məktəb şagirdlərinin hərbi-idman oyunlarına geniş cəlb etməklə onların ordu sıralarında xidmətə hazırlığını və turizm hərəkatının inkişaf etdirilməsini təmin etməkdən ibarət olduğunu bildirdi. C.Manafov çıxışında onu da qeyd etdi ki, “Şahinlər” hərbi–idman oyununun məktəbdaxili seçmə yarışları artıq yekunlanmışdır, bu gün oyunların ikinci mərhələsi olan rayon birinciliyi yarışıdır. Rayon birinciliyində qalib gələn komanda 2014-cü ilin aprel ayında Salyan şəhərində keçiriləcək zona mərhələsində rayonumuzu təmsil edəcəkdir.
          Rayonun orta ümumtəhsil məktəblərinin komandalarının iştirak etdiyi yarış gərgin idman mübarizəsi şəraitində keçmişdir. Yarışın əsasnaməsinə uyğun olaraq sıra hazırlığı mərhələsi keçirildikdən sonra komandalar estafet mərhələsini davam etdirmişlər.
               Yarışın yekun nəticəsinə əsasən R.Əlihəsənov adına Şəhər 1 saylı tam orta məktəbin komandası I yerə , S.Tağıyev adına Digah  tam orta məktəbin komandası II yerə, X.Məmmədov adına Xırmandalı  kənd tam orta məktəbin komandası III yerə,  Fərqləndiyinə görə isə  S.Hacıyev adına Kalinovka kənd tam orta məktəbin komandası və Seybətin tam orta məktəbin komandası diplomla təltif edilmişdir .