Masallıda çiyələk əkini və işçiyə təlabat

Cari ildə  Masallı rayonu üzrə çiyələk əkinləri  217,0  hektar təşkil edir.  Artıq məhsul yığımına başlanmışdır.  Çiyələk sahələrində yüksək məhsuldarlıq və bu səbəbdən kütləvi  yığım may və iyun aylarına təsadüf edir.  Bu dövürdə mövsümi işçilərə olan tələbat xeyli  artır.
Çiyələk əkinləri əsasən ayrı-ayrı fermerlərin icarəyə götürdükləri  torpaq sahələrində və ailə təsərrüfatlarında, qismən də həyətyanı sahələrdə aparılmışdır. Əsasən çiyələk bitkisi rayonun  Təzə Alvadı, Təklə, Şərəfə, Çaxırlı  və  Köhnə Alvadı ərazilərində əkilmişdir. Bu sahələrdə  hazırda 750 nəfərə yaxın işçi çalışır.
Yerlərdə aparılmış monitorinqlər və çiyələk əkən fərdi sahibkarlarla görüşlər nəticəsində, məhsulun kütləvi yığın dövrünün  yaxınlaşdığını nəzərə alaraq 500 nəfərə yaxın  mövsümi  işçiyə ehtiyac olduğu müəyyən olunmuşdur.  Mövsümi işçilərlə əlaqədar işçilərin  bir qisminin qonşu rayonlardan cəlb edilməsini nəzərə alaraq, bu işçilərin rayonun ayrı-ayrı  kəndlərindən olmasını  məqəsdəmüvafiq hesab edirik. Bununla bağlı Ərazi nümayəndələri və Bələdiyyə üzvləri  yerlərdə  əhalini bu məsələ ilə bağlı məlumatlandırıb, işləmək istəyən vətəndaşların sahibkarlarla əlaqələndirilməsinə yaxından köməklik göstərməlidirlər.
Çiyələk sahələrində çalışmaq istəyən vətəndaşlardan da öz ərazilərində ərazi nümayəndəsi və ya bələdiyyə sədrlərinə müraciət etmələri tövsiyyə olunur.