Məktəblilərin dispanserizasiyası

01-30 noyabr 2014-cü il tarixlərində Rayonumuzda uşaqların dispanserizasiyası uğurla davam edir. Növbəti tibbi müayinə Yeddioymaq kənd  orta məktəbində keçirilib. Kənd həkim məntəqəsinin müdiri Güloğlan Alışanov bu cür tibbi tədbirin Azərbaycan Respublikasının müvafiq qanununa və RMX-nin əmrinə əsasən həyata keçirildiyini vurğuladı. Yaşayış məntəqələri, məktəblər və bağçalar üzrə icbari dispanserizasiyanın təqvimi tərtib olunub.
  Masallı rayon Mərkəzi Xəstəxanasının səyyar briqadası Yeddioymaqda 400 nəfərə yaxın məktəblini müayinə edib. RMX-nın baş pediatrı İlqar Qurbanov, laborant Kəmalə Nəcəfova, oftalmoloq Yaşar Bağırov, stomotoloq Ruslan Rəsulov, kardioloq Nazimə Əsgərli, həkimlərdən Təranə Kazımova, Hatəvan Quliyeva, Gülayə Quliyeva və başqaları tibbi xidməti diqqətlə aparır, uşaqların şikayətini diqqətlə dinləyirlər.
  Rayonumuzda 212 min əhali vardır ki, onlardan 45478 nəfəri 17 yaşadək  uşaqlardır. O cümlədən bir yaşında olan 3012 uşaq vardır. İcbari dispanserizasiyaya cəlb olunacaq yeniyetmələrin siyahısı RMX-nın bütün tibb məntəqələrinə göndərilib. Ümumilikdə 28564 uşaq tibbi müayinədən keçirilmiş, onların hər biri üçün göndəriş vərəqəsi yazılmış, müəyyən hissəsi isə “Elektron sağlamlıq kartı”na daxil edilib. Bununla belə xəstə və xəstələnmə riski olan uşaqlardan 1724-ü dispanser müşahidəsinə götürülmüş, onlara “Uşağın dispanser müşahidə kartı” tərtib edilib. Yekun nəticələr ilin sonuna kimi dəqiqləşdirilib səhiyyə nazirliyinə təqdim ediləcək.