MASALLI ŞƏHƏR İNZİBATİ ƏRAZİ DAİRƏSÜ ÜZRƏ NÜMAYƏNDƏLİYİNİN HESABAT YIĞINCAĞI

RİH başçısının Masallı şəhər inzibati ərazi dairəsi üzrə nümayəndəsi Kamal Mazanov “Sənaye ili” kimi yadda qalan ötən ilin nəticələri və 2015-ci il üçün qarşıda duran vəzifələr barədə məruzə etdi: genişlənəcək şəhər ərazisinin – Dadva, Digah, İsgəndərli, Seybətin, Kosakül də daxil olmaqla – 2554 hektar torpağı, 25.038 nəfər əhalisi, 7118 yaşayış evi, 6001 təsərrüfatı var. Burada 7 tam orta məktəb, 1 lisey, 4 uşaq bağçası, uşaq incəsənət məktəbi, uşaq yaradıcılıq məktəbi, 3 uşaq-gənclər idman məktəbi, 4 istirahət parkı, Bayraq meydanı, xatirə parkı, 4 bazar, 5 şadlıq evi, 10 məscid, dövlət və qeyri-dövlət müəssisələri, avtovağzal, mehmanxana, 5 yanacaq məntəqəsi, “Embawood” mebel fabriki, “Nur-M” koncerv zavodu, 2 kərpic zavodu, idman olimpiya kompleksi, boks və taekvondo mərkəzləri, onlarca təmir-bərpa sexi fəaliyyət göstərir.
Günbəgün siması dəyişən şəhərin S.Məmmədov və S.Vurğun küçələrində 8050, Qarabağ – Füzuli küçələrində, Heydər Əliyev prospekti istiqamətində 4040 kvadratmetr asfalt vurulmuş, səkilərə bardür və metlax düzülmüş, ərazi işıqlandırma sistemi ilə təchiz edilmişdir. İsgəndərli – Ərkivan istiqamətində yol 15 metr genişləndirilmiş, küçə hasarları, səkilər yenilənmiş, hər iki tərəfdə yaşıllıq salınmışdır. Heydər Əliyev prospekti, Qarabağ, H.Aslanov küçələri boyunca kommunal binalarda təmir işləri aparılmışdır. 1 nömrəli tam orta məktəbin binası əsaslı təmir olunmuş, 5 nömrəli uşaq bağçasının tikintisi başa çatmışdır. 2 nömrəli uşaq bağçası-körpələr evi üçün binanın inşası davam etdirilir. İçməli suyun verilmə müddətinin artırılması məqsədilə Ərkivan–Yusifli su mənbəyində yeni nasoslar qoyulmuş, xətlərdə təmir işləri görülmüşdür.
Əhali fasiləsiz olaraq işıq və qazla təmin edilmişdir. Əcnəbi dillərdə yazılmış reklam lövhələri götürülmüş, fiziki şəxslərə xəbərdarlıq edilmişdir. Qanunsuz tikililərə və küçə ticarətinə nəzarətin artmasına baxmayaraq burada hələ də nöqsanlar mövcuddur. Uşaq hüquqlarının müdafiəsi, erkən nikahların qarşısının alınması istiqamətində tədbirləri həyata keçirilmişdir. Ötən il 306 məzundan 143-ü ali məktəbə sənəd vermiş, 94 nəfər tələbə adını qazanmışdır. Sahibkarlığın inkişafına, sənaye sahələrinin genişləndirilməsinə xüsusi diqqət yetirilib, kənd təsərrüfatında müsbət nəticələr əldə olunub.
Ərazi nümayəndəsinin müavini Fərid Novruzov vətəndaşların şikayətlərinə baxılması ilə bağlı məlumat verdi.
Əməkdar müəllim Mirqabil Hüseynov, müəllimlər Zemfira Əkbərova, İbrahim Bağırov görülən işləri təqdir edib müvafiq təkliflər verdilər. Cəfər Əzizov H.Aslanov küçəsində piyada keçidinin vacibliyini, Camaləddin Məmmədov Seybətin dairəsindəki narahatçılığı gündəmə gətirdi. Seybətinli Süleyman Allahverdiyev xəstə övladına qayğıya görə rayon rəhbərliyinə minnətdarlıq etdi. Nümayəndəliyin bir illik fəaliyyəti qənaətbəxş sayıldı.
RIH başçısı Rafil Hüseynov bildirdi ki, Masallının baş plan-layihəsinin ilkin variantı hazırdır. 2015-ci ildə Z.Əliyeva, Talışxanov, R.Abbasov, Qurtuluş küçələrinin əsaslı təmiri, muzey, incəsənət məktəbi, uşaq bağçası, kənd təsərrüfatı laboratoriyası, mühafizə bölməsi üçün binaların, Bayraq meydanının açılşı, Viləşin şəhər ərazisindən keçən hissəsində park-bulvarın salınması, Seybətində sənaye məhəlləsinin yaradılması, bərk tullantıların emalı üçün müəssisə, rayon məhkəməsi, “Asan xidmət” üçün binaların tikintisi nəzərdə tutulub. Turizm qapısı sayılan H.Aslanov küçəsində işlər davam etdiriləcək, 2 kilometr yol daha 1,5 kilometr uzadılacaq, nəzarət kameraları ilə təchiz ediləcək. Kosakül və Seybətin məktəblərinin yolları təmir olunacaq. Seybətin dairəsində işıqfor qurulacaq. Əsaslı təmirdən sonra mərkəzi xəstəxana müasir avadanlıqlarla təchiz ediləcək. Yeni məktəblər tikiləcək.
Rayon rəhbəri tövsiyə etdi ki, səmərəli təkliflərdən yararlanmalı, işgüzar adamlardan istifadə etməliyik. Hər bir fərd çalışmalıdır ki, regionda aparıcı dövlət rolunu oynayan ölkəmizin inkişafında onun da payı olsun.