“Zərərli vasitələrlə mübarizədə milli-mənəvi dəyərlərin əhəmiyyəti” mövzusunda seminar

14 fevral 2015-ci il tarixdə Masallı şəhər Heydər Əliyev Mərkəzində Masallı rayon İcra hakimiyyəti yanında Narkotik vasitələrin qanunsuz dövriyyəsinə və narkomanlığa qarşı mübarizə Komissiyası və Dini Qurumlarla İş üzrə Dövlət Komitəsi Cənub bölgə şöbəsinin birgə təşkilatçılığı ilə “zərərli vasitələrlə mübarizədə milli-mənəvi dəyərlərin əhəmiyyəti” mövzusunda seminar keçirilmişdir.
Seminarı giriş sözü ilə açan Masallı rayon İcra hakimiyyətinin başçısı aparatının Hüquq şöbəsinin müdiri Məmmədhüseyn Hüseynov narkomanlıqla mübarizə barədə geniş fikir mübadiləsi aparmış və bu barədə müsbət nəticələr olduğunu və bundan sonara da  bu cür tədbirlərin davam etdirilməsini tədbir iştirakçılarının nəzərinə çatdırmışdır.
Sonra Dini Qurumlarla İş üzrə Dövlət Komitəsi Cənub bölgə şöbəsinin nümayəndəsi Kamil Bağırov geniş məruzə ilə çıxış edərək rayonumuzun din xadimlərinin, ruhanilərinin, ziyalılarının ağsaqqallarının və hüquq mühafizə əməkdaşlarının birgə apardıqları işləri xüsusi vurğulamışdır.
Seminarda çıxış edən Qafqaz Müsəlmanları İdarəsinin Cənub bölgəsi üzrə Qazisi Mirqiyas Təhməzov, R. Əlihəsənov adına Masallı şəhər 1 saylı tam orta məktəbinin direktoru Mirqabil Hüseynov, Rayon Veteranlar Şurasının sədri Məmmədağa Şiriyev və başqaları tədbirdə iştirak edənləri rayonda narkomanlığa və pis vərdişlərə qarşı mübarizədə daha da sıx birləşməyi və bu yolda daha əzmkarlıqla mübarizə aparmağa çağırdılar.
Tədbirin sonunda Masallı rayon İcra hakimiyyətinin başçısı aparatının Hüquq şöbəsinin müdiri Məmmədhüseyn Hüseynov bu cür tədbirlərin rayonun müxtəlif ərazilərində mütəmadi keçirilməsini və təbliğatın daha da genişləndirilməsinin vacib olduğunu vurğulayaraq əhali arasında narkomanlığın yayılmasının qarşısını almağı rayon ağsaqqallarına və ziyalılarına tövsiyə etdi.