Ərkivan qəsəbəsi inzibati ərazi dairəsi üzrə nümayəndəliyin hesabatı

RİHB-nin Ərkivan qəsəbə inzibati ərazi dairəsi üzrə nümayəndəsi Sabiq Cahangirov “2014-cü ildə görülmüş işlər və 2015-ci ildə qarşıda duran vəzifələr” mövzusunda məruzə etdi. Natiq bildirdi ki, ötən il yüksəliş, sabit və davamlı inkişaf  ili kimi tarixə düşdü. Coğrafi mövqe, hərtərəfli inkişafına görə rayonun ictimai-siyasi həyatında əhəmiyyətli rol oynayan qəsəbənin iqtisadi göstəricilərindən bəhs edən sözçü göstərdi ki, əkinçilik, maldarlıq və sənaye sahələrində çalışan əhalinin bir qismi dulusçuluq, sandıqçılıq, xarratlıq və başqa sənətkarlıq növləri ilə də məşğul olur. Ümumi sahəsi 2294 hektar olan qəsəbədə 17329 nəfər əhali 4285 təsərrüfatda təmsil olunur. Ərazidə 4 tam, 1 ümumi, 1 ibtidai məktəb, 2 kitabxana, 90 yerlik uşaq bağçası, sağlamlıq mərkəzi, 2048 nömrə tutumlu  elektron ATS, poçt şöbəsi, 2 kərpic zavodu, 3 yanacaq və 1 maye qaz məntəqəsi, 1 çörək zavodu, 6 çörək sexi, mebel sexi, 74 ticarət obyekti, 10 məscid, 2 ziyarətgah, 2 şadlıq sarayı və digər obyektlər yerləşir. 5 futbol, 3 voleybol, 2 güləş zalı fəaliyyət göstərir.
Abadlıq-quruculuq, yol infrastrukturunun yaxşılaşdırılması istiqamətində görülən işlərdən danışan ərazi nümayəndəsi qeyd etdi ki, mərkəzi stadiona gedən yola, Bədirli, Ramazanlı, Abaslı, Zeynoba, Bağlakücə və Miyondi küçələrinə  asfalt döşənmiş, ara yollara isə qum-çınqıl tökülmüşdür. Məktəblərdə cari təmir işləri aparılmış, Şəhidlər Xatirə Parkı ərazisində çay evi tikilmişdir. Məktəb, idarə və müəssisələrin həyətində, parkda, yol kənarlarında dekorativ ağaclar əkilmişdir. İsgəndərli-Ərkivan dairəsi istiqamətində 4 kilometr yol yeni görkəm almışdır. Ərkivan qalasının simvolunu özündə əks etdirən möhtəşəm Qala divarı başa çatmaqdadır.
Ərazi nümayəndəsinin müavini Əhməd Əhmədov respublikanın yuxarı təşkilatlarına ünvanlanan ərizə və şikayətlərin icrasına dair hesabat verdi. Məruzəçi qeyd etdi ki, vətəndaşları narahat edən məsələlərə daha obyektiv və yerində baxmaqdan ötrü RİH başçısı cənab Rafil Hüseynov ötən ilin yanvar və oktyabr aylarında qəsəbədə 2 dəfə səyyar görüş keçirmişdir. Yerli rəhbərliyin səlahiyyətində olanlar həll edilmiş, digərləri barədə isə aidiyyatı təşkilatlar qarşısında məsələ qaldırılmışdır.
Ərazi nümayəndəliyinin bir illik fəaliyətini qənaətbəxş qiymətləndirən iştirakçıların fikir və təklifləri maraqla izləndi.
Rayon müharibə, əmək və silahlı qüvvələr orqanları veteranlar təşkilatının sədri Məmmədağa Şiriyev hüquq və cinayət pozuntularının qarşısını almaq məqsədilə qəsəbədə polis post-patrul xidmətinin operativliyini yüksəltmək, qəsəbə ağsaqqallar şurasının sədri Şərafət Əzimov kommunal xidmət və ekoloji problemlə bağlı, müəllim Mənijə Yəhyayeva lisey-məktəb yaradılması təklifi ilə çıxış etdi. Əməkdar məşqçı Həbib Mehdiyev qəsəbədə idman kompleksinin tikilməsini, Raci Səfərov mədəniyyət mərkəzinin,  məktəb yolunun təmir edilməsini xahiş etdi. Sakinlərdən Sərhəd Əzizov, Firdovsi Abbasov, Nizam Həşimov və digərləri görülən işlərdən razılıqlarını bildirib, ərazi nümayəndəsinin fəaliyyətini qənaətbəxş  hesab etdilər.
Hesabat yığıncağını RİH başçısı Rafil Hüseynov yekunlaşdırdı:
–Ərkivanın tərəqqisi naminə görülən işlər göz qabağındadır. Bu qəsəbədə tarixi qədim Ağ məktəbin yeni binası və idman kompleksi tikintisi nəzərdə tutulub. Su və kanalizasiya sistemi layihəli şəkildə həyata keçiriləcək. Yerli iş adamı Gülağa Qənbərovun təşəbbüsü ilə yeni mədəniyyət mərkəzinin inşası barədə də razılıq əldə edilib. Təşəbbüskar insanların fikrinə hörmətlə yanaşmalı, iş görən adamlara dəstək olmalıyıq. Bilirik ki, iş görən kimdir, inkişafı gözü götürməyən kim. Ölkə rəhbərinin önəm verdiyi gənclər siyasətinin bariz nümunəsi kimi  gənclərin və böyük potensiala malik qadınların bələdiyyələrdə təmsil olunmağı təqdirəlayiqdir. Ümidvarıq ki, qəsəbə ərazi nümayəndəliyi və yeni tərkib bələdiyyələrin birgə, əlbir fəaliyyətinin müsbət nəticəsini görəcəyik. İnanırıq ki, 2015-ci ildə Ərkivanın siması daha da gözəl olacaq.