Şəhid əsgər Ziya Gözəlov
Ziya Zahid oğlu Gözəlov 19 yanvar 2002-ci il tarixdə Masallı rayonunun Kəlbəhüseynli kəndində anadan olub. 2008-2019-cu illərdə şəhid Nicat Əbilov adına Kəlbəhüseynli kənd tam orta məktəbində təhsil alıb. Orta təhsilini başa vurduqdan sonra 2020-ci ilin yanvar ayından Azərbaycan Silahlı Qüvvələrində, «N» saylı hərbi hissədə xidmət etməyə başlamışdır.
Azərbaycan Ordusunun əsgəri olan Ziya Zahid oğlu Gözəlov 27 sentyabr 2020-ci il tarixdə Azərbaycan Silahlı Qüvvələri tərəfindən erməni işğalı altında olan ərazilərin azad edilməsi üçün başlanan Vətən müharibəsi zamanı Füzuli rayonu uğrunda gedən döyüşlərdə düşmənlərə qarşı böyük mərdliklə döyüşmüşdür.
22 noyabr 2020-ci ildə şəhid Ziya Zahid oğlu Gözəlovun nəşi Masallı rayonunun Çaxırlı kənd məzarlığında izdihamla dəf olundu. Subay idi...
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş qapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti cənab İlham Əliyevin 15 dekabr 2020-ci il tarixli Sərəncamına əsasən Ziya Zahid oğlu Gözəlov ölümündən sonra «Vətən uğrunda» medalı ilə təltif edildi.
