Şəhid əsgər Sübhan Həsənov

Sübhan Rauf oğlu Həsənov 26 iyul 2001-ci ildə Masallı şəhərində anadan olub.
2007-ci ildə şəhid Masallı şəhər İ.Zülalov adına İsgəndərli kənd tam orta məktəbinin birinci sinfinə daxil olıub. 2018-ci ildə həmin məktəbin onbirinci sinfini bitirib.
2019-cu ilin 30 iyul tarixində hərbi xidmətə yollanıb.
Hərbi xidmətini Goranboy rayonunda yerləşən «N» saylı hərbi hissədə yerinə yetirdi. Snayperçi olub. Ordudan tərxis olunmağına sayılı günlər qalırdı...
Azərbaycan Ordusunun əsgəri Sübhan Rauf oğlu Həsənov 27 sentyabr 2020-ci il tarixdə Azərbaycan Silahlı Qüvvələri tərəfindən erməni işğalı altında olan ərazilərin azad edilməsi uğrunda başlanan Vətən müharibəsi zamanı Füzuli, Ağdərə və Suqovuşan istiqamətində gedən döyüşlərdə düşmənə qarşı böyük mərdliklə döyüşərək  şəhidlik zirvəsinə ucalıb. Dekabrın 7-də doğulub boya-başa çatdığı Masallı şəhər qəbiristanlığında izdihamla dəfn edilib. Subay idi.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş qapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti  cənab İlham Əliyevin 15 dekabr 2020-ci il tarixli Sərəncamına əsasən Sübhan Rauf oğlu Həsənov  ölümündən sonra «Vətən uğrunda»  medalı ilə təltif edildi.