Şəhid əsgər Cəbrayıl Qasımov

Cəbrayıl Baloğlan oğlu Qasımov 19 iyul 1996-cı ildə Masallı rayonunun Ərəb kəndində anadan olub. 2002-ci ildə Rafiq Əlihəsənov adına Masallı şəhər 1 nömrəli tam orta məktəbinin birinci sinfinə daxil olub. 2013-cü ildə həmin məktəbi bitirib.

Orta təhsilini başa vurduqdan sonra 2014-cü ilin iyul ayında çağırışçı kimi hərbi xidmətə yollanıb. Əsgərliyini Azərbaycan Silahlı Qüvvələrinin Tərtər rayonunda, “N” saylı hərbi hissəsində rabitəçi kimi davam etdirib. 2016-cı ilin yanvar ayında ordu sıralarından tərxis olunub.

Azərbaycan Ordusunun əsgəri Cəbrayıl Baloğlan oğlu Qasımov 27 sentyabr 2020-ci il tarixdə Azərbaycan Silahlı Qüvvələri tərəfindən Vətən müharibəsi zamanı Füzuli və Cəbrayıl rayonlarının işğaldan azad olunması uğrunda gedən döyüşlərdə düşmənə qarşı böyük mərdliklə döyüşərək şəhidlik zirvəsinə ucalıb. Şəhidin nəşi 9 oktyabr 2020-ci il tarixdə doğulduğu Ərəb kənd qəbiristanlığında izdihamla torpağa tapşırılıb. Nişanlı idi.

Azərbaycan Respublikasının ərazi bütövlüyünün təmin olunması uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Silahlı Qüvvələrinin əsgəri Cəbrayıl Baloğlan oğlu Qasımov ölümündən sonra “Vətən uğrunda” medalı ilə təltif olunub.