Şəhid gizir Elvin Əzizov

Elvin Əfrail oğlu Əzizov 25 mart 1986-cı ildə Masallı rayonunun Qarğalıq kəndində anadan olub. 1992-2003-cü illərdə şəhid Ədalət Vəliyev adına Qarğalıq kənd tam orta məktəbində təhsil alıb. 2004-cü ilin aprel ayında həqiqi hərbi xidmətini Azərbaycan Silahlı Qüvvələrinin “N” saylı hərbi hissəsində davam etdirib. 2005-ci ilin oktyabr ayında həqiqi hərbi xidmətini başa vurub. 2009-cu ildə gizir kursunu bitirəndən sonra hərbi xidmətini MAXE kimi davam etdirib. Müdafiə Nazirliyinin 7 mart 2011-ci il tarixli müvafiq əmrinə əsasən "N" saylı hərbi hissədə tank komandiri vəzifəsini yerinə yetirib.

Azərbaycan Ordusunun giziri Elvin Əzizov 27 sentyabr 2020-ci il tarixdə Azərbaycan Silahlı Qüvvələri tərəfindən Vətən müharibəsi zamanı torpaqlarımızın işğaldan azad olunması uğrunda Füzuli rayonu ərazisində gedən qızğın döyüşlərdə düşmənə qarşı böyük mərdliklə döyüşərək şəhidlik zirvəsinə ucalıb. Şəhid gizir Elvin Əzizov 16 oktyabr 2020-ci il tarixdə doğulduğu Qarğalıq kənd qəbiristanlığında izdihamla torpağa tapşırılıb. Ailəli idi. Üç övladı-iki qızı və bir oğlu var.

Azərbaycan Respublikasının ərazi bütövlüyünün təmin olunması uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Silahlı Qüvvələrinin giziri Elvin Əfrail oğlu Əzizov ölümündən sonra “Vətən uğrunda” medalı ilə təltif olunub.