Masallıda "Bahar nəfəsli Şuşa"
Masallıda "Bahar nəfəsli Şuşa" onlayn formatda nümayiş olunub.
Masallı Rayon Mədəniyyət Mərkəzinin nəzdində fəaliyyət göstərən Xalq teatrı növbəti - "Bahar nəfəsli Şuşa" adlı ədəbi-bədii kompozisiyanı teatr həvəskarlarına təqdim edib.
Xalq təqviminə görə ilin sonuncu - Torpaq çərşənbəsi münasibətilə hazırlanmış virtual tamaşada baharın gəlişi, təbiətin oyanışı bahar ovqatlı şeir ifaları ilə tamaşaçılara çatdırılıb. Eyni zamanda səhnə ustaları təbiətin canlanmasını Azərbaycanın mədəniyyət paytaxtı Şuşa şəhərinin azadlığı və dirçəlişi ilə rəmzlər vasitəsilə əlaqələndiriblər. Tamaşada həmçinin, tanınmış sənət adamları tərəfindən musiqi nömrələri ifa edilib, azyaşlı və məktəblilər isə şeir və musiqi kompozisiyaları səsləndiriblər.
Kompozisiyanın hazırlanması və səhnəyə qoyulmasında teatrın rejissoru Cəmaləddin Əliyev, sənətçilər Atamoğlan Zahid və Məhbub Şüküroğlu, bədii qiraətçi Ziyafət Hüseynov, aktyor Cavid Quliyev, istedadlı prodüser Mərhəmət Lələyev, "Viləş" məktəbəqədər təhsil müəssisəsinin balaca fidanları və digərləri iştirak ediblər.
Qeyd edək ki, ədəbi-bədii kompozisiya sosial şəbəkələr vasitəsilə canlı yayımlanıb.
