“Zəfər müjdəli bahar” başlığı altında onlayn tədbir

17 mart 2021-ci il tarixdə Masallı Rayon R. Tağıyev adına Tarix-Diyarşünaslıq Muzeyində Novruz bayramı ilə bağlı “Zəfər müjdəli bahar” başlığı altında onlayn tədbir keçirilmişdir.

Karantin rejiminin qaydalarına uyğun keçirilmiş tədbirdə muzeyin əməkdaşları və rayonun Qızılavar kənd tam orta məktəbinin müəllim və şagird kollektivi iştirak edib.

Əvvəlcə, şəhidlərmizin xatirəsi bir dəqiqəlik sükutla yad edilib.

Muzeyin direktoru, Əməkdar mədəniyyət işçisi Əntiqə Tağıyeva çıxışı zamanı Novruz bayramının qeyd edilmə tarixi və ənənələri, çərşənbələr və bayram günü icra olunan bir sıra unudulmuş ayin və mərasimlər barədə geniş söhbət açıb. Qeyd edib ki, Novruz bayramının qeyd olunması xalqımız üçün əlamətdar olan mühüm tarixi günlərə təsadüf edir. Belə ki, Qarabağda qazandıqımız tarixi qələbə hər bir Azərbaycanlının qəlbində yer etmiş vətən nisgilini bahar təravətli nikbinlik və qürur əvəz edib. O, bahara zəfər ovqatı qatan şəhidlərin müqəddəs ruhuna dərin ehtiram ifadə edərək, onların valideynlərini bayram münasibətilə təbrik edib. Ə. Tağıyeva həmçinin, qədim zamanlarda Novruz mərasimləri zamanı istifadə olunmuş bir sıra tarixi əşyalar haqda da bəhs edib.

Muzeyin elimi işçisi Dilgüşə Məmmədova Novruz adət-ənənlərinin qorunması, gələcək nəsillərə ötürülməsi və təbliği işində gənclərin rolunun əhəmiyyətindən söz açıb. O, çıxışının sonunda Novruz bayramı münasibətilə tədbir iştirakçılarını təbrik edib, məktəblilərə dərslərində uğurlar arzulayıb.

Sonra Qızılavar kənd tam orta məktəbi şagirdlərinin ifasında Novruz baytıları və şeir kompozisiyaları dinlənilib.

Tədbirin sonunda iştirakçılar muzeyin ekspozisiya zalında təşkil olunan virtual bahar sərgisi ilə tanış edilib.