Mədəniyyət sahəsi üzrə əməkdaşlar şəhid ailələrini ziyarət etdi
Mədəniyyət sahəsi üzrə yerli həmkarlar təşkilatının dəstəyi ilə şəhid ailələri ziyarət olunub.
Mədəniyyət İşçiləri Həmkarlar İttifaqının (MİHİ) Masallı rayon komitəsinin təşkilatçılığı və maddi dəstəyi, Masallı Regional Mədəniyyət İdarəsinin rəhbər işçilərinin iştirakı ilə şəhid ailələri və müharibə qaziləri Novruz bayramı münasibətilə ziyarət olunub.
Komitə sədri və mədəniyyət işçiləri əvvəlcə, rayon mərkəzində şəhid Vüsal Balarəzi oğlu Hadıyevin ailəsinə baş çəkiblər, sonra rayonun Ərkivan qəsəbəsi və Hişkədərə kəndində vətənin qəhrəman şəhid övladlarından Famil Habil oğlu Əlizadə, leytenant Zaur Vaqif oğlu Hüseynov və Vüsal Aslan oğlu Məhərrəmovun ailələrini, həmçinin Rüdəkənar kəndində qazi Arzuman Əlipaşa oğlu Həbibovu ziyarət ediblər. Görüşlər zamanı mədəniyyət işçiləri valideynlərin dərdinə şərik olduqlarını ifadə edib, onlara Allahdan səbir diləyib, ailələrin qayğıları və maddi ehtiyacları ilə maraqlanıblar. Sonra ailələr bayram münasibətilə təbrik olunub, onlara Novruz sovqatı təqdim edilib.
Daha sonra mədəniyyət işçiləri şəhidlərin məzarını ziyarət edib, mərhumların ruhuna dualar oxuyublar.
