YAP veteranları ilə görüş keçirilmişdir

21 may 2015-ci il tarixdə YAP Masallı rayon təşkilatının təşkilatçılığı ilə Heydər Əliyev parkında yerləşən “Ağsaqqallar evində” YAP veteranları ilə görüş keçirilmişdir.
Görüşdə iştirak edən Masallı Rayon İcra Hakimiyyətinin Başçısı Rafil Hüseynov ölkəmizin son dərəcə çətin sınaqlar qarşısında qaldığı bir vaxtda yaranan Yeni Azərbaycan Partiyasının rolundan ətraflı bəhs etmişdir: “Ulu öndər Heydər Əliyevin rəhbərliyi ilə yaradılmış və bu gün Prezident İlham Əliyevin Sədri olduğu Yeni Azərbaycan Partiyasının nüfuzu gündən-günə artmaqdadır. Yeni Azərbaycan Partiyasının cəmiyyətin inkişafını hədəfləyən çoxsaylı sosial layihələr reallaşdırması, gəncləri dövlətçilik, milli maraqlar ətrafında sıx birləşdirməsi partiyanın tərəfdarlarının sayının artmasına səbəb olub. Əsası Ümummilli lider Heydər Əliyev tərəfindən qoyulan inkişaf strategiyasının Prezident İlham Əliyev tərəfindən uğurla davam etdirilməsi nəticəsində Azərbaycan nəinki Cənubi Qafqazda, ümumiyyətlə, Avropada lider dövlətə çevrilib.
Yeni Azərbaycan Partiyasının qurucusu və memarı ulu öndər Heydər Əliyevin misilsiz xidmətlərindən bəhs edən Masallı Rayon İcra Hakimiyyətinin Başçısı Rafil Hüseynov diqqətə catdırmışdır ki, Ümummilli liderimiz Heydər Əliyevin Azərbaycan xalqı və dövləti qarşısında xidmətləri misilsizdir: “Ulu öndər Heydər Əliyev fəaliyyətinin hər bir məqamı ilə xalqın, dövlətin, cəmiyyətin və onun üzvlərinin mənafeyinə xidmət etmiş, Azərbaycan dövlətinin və xalqının bütövlüyü uğrunda fədakarlıqla çalışmış, müstəqilliyimizin möhkəmləndirilməsi, dövlətçiliyimizin inkişafı, xalqın rifah halının daha da yaxşılaşdırılması üçün tarixi işlər görmüşdür”.
Vurğulanıb ki, Ümummilli liderimiz Heydər Əliyevin siyasəti uzun illər davam edəcək və Azərbaycan dövlətinin tərəqqisinin ən böyük təminatı olacaqdır. Bildirilib ki, müstəqil Azərbaycan Ulu öndərin ideyaları əsasında inkişaf edir: “Əsası Ümummilli liderimiz Heydər Əliyev tərəfindən qoyulan sosial-iqtisadi inkişaf strategiyasının ölkə Prezidenti cənab İlham Əliyev tərəfindən layiqincə davam etdirilməsi, qəbul olunmuş Dövlət proqramlarının müvəffəqiyyətlə icrası respublikamızın bütün regionlarında iqtisadiyyatın hərtərəfli inkişafını təmin etmişdir. Bu inkişaf rayonumuzda da özünü xüsusilə büruzə verməkdədir”.
Görüşdə iştirak edən Prezident təqaüdçüsü Şirvan Əbilov YAP Masallı rayon təşkilatının yaranma tarixindən söz açdı.
Tədbirdə iştirak edən YAP Masallı rayon təşkilatının sədri Seyfəddin Əliyev Yeni Azərbaycan Partiyasının qurucusu Ümummilli lider Heydər Əliyevin Azərbaycan dövlətçilik tarixində oynadığı roldan bəhs etmişdir.
Daha sonra çıxış edən Böyük Vətən müharibəsi veteranı, "Lenin orden"li Atabala Hacıyev, Prezident təqaüdçüsü Məmmədhüseyn Həsənov, YAP veteranı Rafiq Bağırov və başqaları  Azərbaycanın hər bir bölgəsində, xüsusilə də Masallıda görülən son  quruculuq işlərindən, Azərbaycanın həyata keçirdiyi beynəlxalq layihələrdən, Bakıda keçiriləcək I Avropa Oyunlarından  söz açdılar və bütün bu işlərdə Azərbaycan Respublikasının Prezidenti İlham Əliyevin müstəsna xidmətlərini vurğuladılar.