Olimpiada qalibləri mükafatlandırılıb
Lənkəran Dövlət Universitetində (LDU) regional fənn olimpiadasının qaliblərinin mükafatlandırılma mərasimi keçirilib.
Riyaziyyat, fizika, kimya, informatika, biologiya və coğrafiya fənləri üzrə artıq 5 ildir ki, keçirilən bilik yarışmasında Cənub bölgəsinin 300-ə yaxın orta ümumtəhsil məktəblərinin IX, X, XI sinif şagirdləri, LDU nəzdində Sosial və Aqrar-Texnoloji Kolleci, Astara Pedaqoji Kolleci və Masallı Dövlət Regional Kollecinin tələbələri iştirak edib.
Qeyd edək ki, onlayn qaydada təşkil olunan olimpiadada Masallı rayonunun üç məktəblisi fərqlənib.
Masallı Rayon İcra Hakimiyyətinin təsisçiliyi ilə nəşr olunan «Yeni həyat» qəzetinin əməkdaşları xəbər verir ki, Qızılağac kənd S.Xəlilov adına 1 nömrəli tam orta məktəbinin IX sinif şagirdi Həsən Həsənzadə coğrafiya fənni üzrə ikinci, həmin məktəbin XI sinif şagirdi İzzət Kazımlı riyaziyyat, Təzə Alvadı kənd E.Əhədov adına 1 nömrəli tam orta məktəbin IX sinif şagirdi Pərvin Məhərrəmova isə biologiya fənni üzrə üçüncü yerə layiq görülüb.
Mükafatlandırma mərasimində LDU-nun rektoru Natiq İbrahimov qaliblərə universitetin diplom, kubok və qiymətli hədiyyələrini təqdim edib.
