Masallı gəcləri şəhid ailəsini ziyarət etdi

Masallı rayon Gənclər və İdman İdarəsinin kollektivi şəhid ailəsini ziyarət etmişdir.

         30 iyul 2021-ci il tarixdə Masallı rayon Gənclər və İdman İdarəsinin kollektivi II Qarabağ müharibəsi zamanı torpaqlarımızın işğaldan azad olunmasında qəhrəmancasına döyüşərək şəhidlik zirvəsinə yüksələn Vəliyev Məhəmməd Nail  oğlunun  ailəsini  ziyarət etmişdir.  Ziyarət zamanı əsgər Vəliyev Məhəmməd Nail  oğlunun  keçdiyi şərəfli döyüş yoldan söhbət açılıb, ailənin  qayğıları dinlənilib. Görüş zamanı Şəhidimizin ailəsi onlara göstərilən diqqət və qayğıya görə  Azərbaycan Respublikasının Prezidenti cənab İlham Əliyevə öz minnətdarlıqlarını bildirmişlər.
 
Şəhid əsgər Məhəmməd Vəliyev
Məhəmməd Nail oğlu Vəliyev 27 iyun 1996-cı ildə Masallı rayonunun İmanlı kəndində anadan olub. 2003-cü ildə Binə Xocavar kənd tam orta məktəbinin birinci sinfinə daxil olub. 2014-cü ildə həmin məktəbi bitirib. Orta təhsilini başa vurduqdan sonra, 2014-cü ilin oktyabr ayında çağırışçı kimi hərbi xidmətə yollanıb. Azərbaycan Silahlı Qüvvələrin “N” saylı hərbi hissəsində xidmət edib. 2016-cı ilin aprel  ayında ordu sıralarından tərxis olunub.
Azərbaycan Ordusunun əsgəri Məhəmməd Nail oğlu Vəliyev 27 sentyabr 2020-ci il tarixdə Azərbaycan Silahlı Qüvvələri tərəfindən erməni işğalı altında olan ərazilərimizin azad edilməsi üçün başlanan Vətən müharibəsi zamanı Füzuli və Qubadlı rayonlarının alınması uğrunda gedən döyüşlərdə düşmənlərə qarşı böyük mərdliklə döyüşərək şəhidlik zirvəsinə ucalıb. Şəhid əsgər Məhəmməd Vəliyevin nəşi 23 oktyabr 2020-ci il tarixdə Sarıcəfərli kənd qəbiristanlığında izdihamla torpağa tapşırılıb.
       Vəliyev Məhəmməd Nail oğlu   Azərbaycan Respublikasının Prezidenti cənab İlham Əliyevin müvafiq sərəncamları ilə  “ Qubadlının azad olunmasına görə” , “Füzulinin azad olunmasına görə”  və “Vətən uğrunda”  medalları ilə təltif edilib.