Masallıda Avropa çempionu, beynəlxalq dərəcəli idman ustası Əli Əliyevlə görüş
Masallıda Avropa çempionu, beynəlxalq dərəcəli idman ustası Əli Əliyevlə görüş keçirilmişdir.
24 noyabr 2021ci il tarixdə Ərkivan qəsəbə Zahir Nəcəfov adına Ərkivan qəsəbə 2 saylı tam orta məktəbində Masallı rayon Gənclər və İdman İdarəsinin təşkilatçılığı ilə Azərbaycan Respublikasının Gənclər və İdman Nazirliyi, Təhsil Nazirliyi və Azərbaycan İdman Könüllüləri İctimai Birliyinin “Çempionumuz” adlı birgə sosial idman layihəsi çərçivəsində Masallı rayonunda Yunan-Roma güləşi üzrə SSRİ və Avropa çempionu, beynəlxalq dərəcəli idman ustası, respublikanın Əməkdar məşqçisi Əli Əliyevlə məktəblilərin görüş keçirilib. Tədbirdən əvvə Masallı şəhər Qəhrəmanlar Parkındakı Şəhidlər abidə-kompleksi ziyarət olunub, şəhidlərimizin xatirəsi ehtiramla anılıb. Noyabrın 24-də, şəhid Zahir Nəcəfov adına Ərkivan qəsəbə 2 saylı tam orta məktəbində təşkil olunan görüşdə məktəbin müəllim və şagirdləri ilə yanaşı rayon gənclər və idman idarəsinin əməkdaşları, idmançılar, media nümayəndələri iştirak ediblər. Tədbir respublikamızın ərazi bütövlüyü uğrunda döyüşlərdə şəhid olan Vətən oğullarının xatirəsinin bir dəqiqəlik sükutla yad edilməsilə başlayıb. Sonra Əli Əliyevin beynəlxalq yarışlarda qazandığı uğurlardan bəhs edən videoçarx izlənilib. Masallı Rayon Gənclər və İdman İdarəsinin rəisi Sabiq Cahangirov ölkəmizdə Möhtərəm Prezidentimiz İlham Əliyev tərəfindən idmana göstərilən dövlət qayğısından geniş söz açaraq, “Çempionumuz” sosial idman layihəsinin yeniyetmə və gənclər arasında sağlam həyat tərzinin və idmanın təbliğində, o cümlədən nailiyyət qazanmış idmançılarla tanışlıq, idman sahəsində maarifləndirmə işlərinin genişləndirilməsində xüsusi önəminin olduğunu vurğulayıb. Belnəlxalq dərəcəli idman ustası, respublikanın Əməkdar məşqçisi Əli Əliyev şagirdlərə peşəkar idmançı olmağın sirlərindən, idmanın insan sağlamlığındakı rolundan, bu sahədə qazandığı təcrübədən, keçdiyi həyat yolu, çətinlikləri və nailiyyətləri barədə danışıb, cənub bölgəsinin güləş rəmzinə, pəhləvanlıq etalonuna dönmüş unudulmaz məşqçisi Nadir Ağayevi xoş xatirələrlə yada salıb. Ə.Əliyev məktəbliləri maraqlandıran sualları cavablandırıb, onlara tövsiyələrini verib. “Yeni həyat” (Masallı) qəzetinin əməkdaşı, Azərbaycan İdman Jurnalistləri Assosiasiyasının üzvü Akif Ağayev, “Asiya.az” xəbər portalının rəhbəri Cəfər Cəfərov, Əməkdar məşqçi Səyədulla Əkbərov, məktəbin müəllimləri Ədalət Cahangirov, Yadigar Cəlalov çıxışlarında 19 yaşında Avropa çempionu tituluna sahiblənən Əli Əliyev haqqında xoş təəssüratlarını bölüşüb, onun keçdiyi şərəfli idman yolundan bəhs ediblər. Natiqlər qeyd ediblər ki, adı Azərbaycan güləşinin təşəkkülü və inkişafı ilə qırılmaz sürətdə bağlı olan Nadir Ağayevdən Əli Əliyev kimi elə qiymətli yadigarlar qalıb ki, bizə və Vətənimizə həmişə başucalığı gətirəcək. Bildirilib ki, Əli Müslüm oğlu Əliyev 10 oktyabr 1957-ci ildə Masallı rayonunun Ərkivan kəndində (Qızlaküçə) anadan olub.
O, 1973-cü ildə Bağlaküçə kənd səkkizillik məktəbini bitirib. Sonra təhsilini Respublika İdman təmayullü orta ümumtəhsil internat məktəbində davam etdirib. 1976-1978-ci illərdə hərbi xidmətdə olub. 1982-ci ildə Azərbaycan Dövlət Bədən Tərbiyəsi İnstitutunu bitirib. Ə.Əliyev ilk məşqlərə 1969-cu ildə, tanınmış pəhləvan, Azərbaycanın Əməkdar məşqçisi Nadir Ağayevin (1935-1985) yanında başlayıb. Əlinin qələbələr silsiləsini əfsanəvi mərhum məşqçisinin fəaliyyətinin ən böyük uğurlarından saymaq olar. İlk böyük uğuruna 1974-cü ildə imza atan Əli Əliyev məktəblilərin Ümumittifaq Spartakiadasında üçüncü yerə sahiblənib. Yarışdan-yarışa daha inamla çıxış edən gənc pəhləvan elə həmin il İtaliyanın Faenço şəhərində keçirilən beynəlxalq turnirin qızıl mükafatını qazanıb. 1975-ci ildə Ukraynanın Zaparojye şəhərində SSRİ kubokunun (beş görüşü udub) sahibi olub. 1976-cı ildə gənclər arasında SSRİ və Avropa çempionu (Polşa, Poznan şəhəri) adını qazanıb. 1977-ci ildə ABŞ-da (Las-Veqasda) keçirilən dünya çempionatının bürünc medalçısı olmaqla güləş karyerasının ən yüksək pilləsinə qalxıb. Gənc atlet 1979-cu ildə SSRİ xalqlarının VII Spartakiadasında (57 kiloqram çəki dərəcəsində) dördüncü, 1982-ci ildə SSRİ çempionatında (Zaporojye şəhərində) ikinci yerin sahibi kimi güləş həvəskarlarının yaddaşında qalıb. Əli Əliyev uzun müddət Daxili İşlər Nazirliyinin “Dinamo” İdman Cəmiyyətində məşqçi-müəllim işləyib. Hazırda təqaüddədir. Ehtiyatda olan polis podpolkovnik-leytenantıdır. Yetirmələri arasında Avropa çempionları, dünya, olimpiya mükafatçıları var. Ailəlidir, 3 övladı, 4 nəvəsi var. Onun yolunu davam etdirən övladları Rüstəm və Fuad beynəlxalq aləmdə Vətənimizin idman şərəfini layiqincə qoruyublar. Hər ikisi Yunan-Roma güləşi üzrə idman ustasıdır. Dəfələrlə respublika çempionu olmuş Rüstəm beynəlxalq turnirlərin mükafatçısı, Dünya kubokunun sahibidir. Fuad isə Avropa və Dünya birinciliklərinin mükafatçısıdır. Hər ikisi Azərbaycan Respublikasının daxili işlər orqanlarında çalışır. Tədbirin yekununda Əli Əliyev ustad məşqçisi Nadir Ağayev haqqında jurnalist-publisist Akif Ağayevin qələmə aldığı “Pəhləvanın salnaməsi” kitabını imzalayaraq məktəblilərə təqdim edib, onlarla xatirə şəkilləri çəkdirildi.
