Masallıda Elşad Baratın “Ölümsüzlər” kitabının təqdimatı

01 dekabr 2021-ci il tarixdə Masallı rayonunda şair Elşad Baratın Vətən müharibəsi şəhidlərinə həsr etdiyi “Ölümsüzlər” adlı kitabının təqdimat mərasimi olub.

Masallı Rayon İcra Hakimiyyətin təşkilatçılığı ilə Heydər Əliyev Mərkəzində keçirilən tədbirdə rayon rəsmiləri, ictimaiyyət nümayəndələri və şəhid ailələri iştirak ediblər.

Əvvəlcə şəhidlərimizin xatirəsi bir dəqiqəlik sükutla yad olunub.

Yeniheyet.az xəbər verir ki, tədbiri giriş sözü ilə açan Masallı Rayon İcra Hakimiyyətinin başçısının müavini, İctimai-siaysi və humanitar məslələr şöbəsinin müdiri Aybəniz Qafarova Möhtərəm Prezidentimizin həyata keçirdiyi uğurlu strategiyadan, Vətən müharibəsində Müzəffər Ali Baş Komandanımızın rəhbərliyilə mətin xalqımızın şücaətindən, milli birlik və döyüşçülərimizin ruh yüksəkliyi sayəsində 44 gün müddətində qazanılan möhtəşəm Zəfərdən danışıb. Şəhidlərin xatirəsinin əbədiləşdirilməsi yönümündə rayonda gerçəkləşən layihələrdən, vətənpərvərlik mövzusunda təşkil edilən silsilə tədbirlərdən söz salan A.Qafarova bunu Vətənimizin qəhrəman övladlarının müqəddəs ruhları qarşısındakı borcumuz kimi dəyərləndirib. O, bildirib ki, Azərbaycan Yazıçılar Birliyinin üzvü, şair Elşad Baratın ərsəyə gətirdiyi yeni kitabı şəhidlərimizin əziz xatirəsinə həsr olunub.

Yaradıcılığından və sayca beçinci kitabı olan “Ölümsüzlər”in  məziyyətlərindən söz salan müəllif Elşad Barat bildirib ki, 300 səhifəlik kitabda 100-ə yaxın şəhid haqqında məlumat, şeir və şəkillər yer alıb.

Müəllif Masallı rayonunun Köçəkli kəndindən olan şəhid baş gizir İntiqam Abbasova həsr etdiyi şeiri söyləyib.

Masallı Tarix-Diyarşünaslıq Muzeyinin direktoru Əntiqə Tağıyeva, şair Nurməmməd Ağayev, Masallı Mərkəzi Kitabxana Sisteminin direktoru Əlhəddin Nəzərov, şəhid Niyaməddin Sultanzadənin anası Mehriban Sultanova müəllifin gördüyü işi yüksək qiymətləndirib, ona gələcək yaradıcılığında uğurlar arzulayıblar.

Şair Elşad Barat tədbirin təşkilatçı və iştirakçılarına minnətdarlığını bildirib.

Müəllif iştirakçılara kitablar təqdim edib, onlarla xatirə şəkilləri çəkdirib.