Masallıda tibb elmləri doktoru, professor Cəbrayıl Ələkbərovla görüş

Masallı rayonunun Qızılağac kəndi şəhid S.Xəlilov adına 1 nömrəli tam orta məktəbində tibb elmləri doktoru, professor, Beynəlxalq ASAMİ (İlizarov) cəmiyyəti Rəyasət heyətinin üzvü, Azərbaycan İlizarov Cəmiyyətinin sədri, Milli Elmlər Akademiyasında dissertasiya komissiyasının üzvü, Dünya Ortoped Cəmiyyətinin üzvü Cəbrayıl Ələkbər oğlu Ələkbərovla görüş keçirilib. Görüşdə pedaqoji kollektivin üzvləri, şagirdlər, şəhid valideynləri, həmçinin dəvət olunan digər qonaqlar, kənd sakinləri iştirak ediblər.
Çıxışçılar qeyd ediblər ki, həmyerlimiz Cəbrayıl Ələkbərov 1974-cü ildə Masallı şəhər 3 nömrəli orta məktəbini bitirmişdir. 1979-1985-ci illərdə Vladivostok Dövlət Tibb İnstitutunun müalicə-profilaktika fakültəsini bitirmişdir. 1985-1986-cı illərdə 20 saylı RF Sverdlovsk şəhər xəstəxanasında internatura keçmişdir. 2000-ci ildə namizədlik ( RF Kurqan şəhəri, təkrar attestasiya, 2010-cu il, Azərbaycan) dissertasiyasını, 2007-ci ildə doktorluq ( RF Moskva şəhəri, təkrar attestasiya, 2011-cu il, Azərbaycan) dissertasiyasını müdafiə edib. Cəbrayıl Ələkbərov 2 monoqrafiyanın, müxtəlif beynəlxalq jurnallarda dərc edilən 112 elmi məqalənin (Azərbaycanda 5 , Amerikada 2, Ingiltərədə 4, Italiyada 3, İsveçdə 2, Russiyada və Türkiyədə 79) 2 ixtiranın, 2 səmərələşdirici təklifin müəllifidir. 14 mindən artıq əməliyyat aparıb və s.
Masallı Rayon İcra Hakimiyyətinin təsisçiliyi ilə nəşr olunan «Yeni həyat» qəzetinin Baş redaktoru Əlihüseyn Şükürov xəbər verir ki, Qızılağac kəndi şəhid S.Xəlilov adına 1 nömrəli məktəbdə keçirilən görüşdə həkim-alim Cəbrayıl Ələkbərov səmimi çıxışı ilə öz həmkəndlilərinə həyat fəaliyyətindən danışaraq, şagirdlərə gələcəkdə peşə seçimlərini düzgün etməyi, öz gələcək peşələrini dərindən mənimsəyərək sevməyi tövsiyə edib.
Sonra tanınmış alim şagirdlər tərəfindən ünvanlanan sulları cavablandırıb.