Həsənağa Əliyev - 75
01 noyabr 2024 | 17:21
Noyabrın 1-də Masallı rayon Mərkəzi Kitabxanasında rayon Ağsaqqallar Şurasının təşəbbüsü ilə jurnalist-publisist, “Yeni həyat” qəzetinin məsul katibi Həsənağa Əliyevin anadan olmasının 75 illiyi ilə əlaqədar tədbir keçirilib.
Tədbir Ulu Öndər Heydər Əliyevin və Azərbaycan Respublikasının suverenliyi və ərazi bütövlüyü uğrunda canlarından keçən şəhidlərimizin əziz xatirəsinin 1 dəqiqəlik sükutla yad edilməsi ilə başlayib.
Tədbiri giriş sözü ilə açan Ağsaqqallar Şurasının sədri Ələşrəf Niftiyev qonaqları salamladıqdan sonra təqdimat xarakterli geniş çıxışında peşəkar və təcrübəli mətbuat xadimi Həsənağa Əliyevin xalqın ziyalısı obrazını və ali mənəvi keyfiyyətləri özündə cəmləyən kamil şəxsiyyət olduğunu vurğulayıb.
Daha sonra Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdiri vəzifəsini müvəqqəti icra edən Zamin Məmmədov Həsənağa Əliyevə Rayon İcra Hakimiyyəti başçısının təbrikini çatdıraraq, rayonun ictimai-siyasi həyatında fəal iştirakı və 75 illik yubileyi münasibətilə RİH başçısı tərəfindən imzalanmış “Fəxri Fərman”ı ona təqdim edib.
Kitabxananın direktor əvəzi Zamin Məmmədov jurnalisti 75-ci doğum günü münasibətilə təbrik edib, ona uzun ömür, cansağlığı və uğurlar arzulayıb. Kitabxanada ziyalı və yaradıcı şəxslərlə görüşlərin keçirilməsinə xüsusi önəm verildiyini, bu qəbildən olan tədbirlərin xoş ənənə kimi bundan sonra da diqqətdə saxlanılacağını bildirib.
“Yeni həyat” qəzetinin əməkdaşı Akif Ağayev uzun illər bir kollektivdə çalışdığı Həsənağa Əliyevin şəxsi həyatda və mətbuat sahəsində şərəfli ömür yolunu keçdiyini qeyd edib. Həmkarının gündəmin nəbzini tutan müxtəlif janrda məqalələri ilə jurnalistika sahəsində qabaqcıl imzalardan biri oluğunu, ömrünün məhsuldar dövründə belə yüksək əzmlə çalışaraq öz zəngin təcrübəsini çəkinmədən gənc kadrlarla bölüşdüyünü diqqətə çatdırıb.
Sonra Azərbaycan Jurnalistlər Birliyinin sədr müavini Şahin Babayev, ”Tərəqqi” medallı Əyyub Mehdiyev, Masallı Ziyalıları İctimai Birliyinin sədri Qardaş Fətullayev, Əməkdar jurnalist Zakir Abbas, Mahmudavar kənd tam orta məktəbinin direktoru Xanım Əliyeva, “Yeni həyat” qəzetinin baş redaktoru Əlihüseyn Şükürov, Mədəniyyət İşçiləri Həmkarlar İttifaqı Masallı rayon Komitəsinin sədri Vəkil İsmayılov, N.Gəncəvi adına Masallı rayon Mədəniyyət Mərkəzinin direktoru əvəzi Ceyhun Bəşirov, Mahmudavar kənd Cümə Məscidinin axundu Vəkil Babayev, Masallı rayon Tarix-Diyarşünaslıq Muzeyinin direktoru Əntiqə Tağıyeva, jurnalist-tədqiqatçı Xodaşirin Cəbiyev və başqaları öz çıxışlarında H.Əliyevin yerli və respublika əhəmiyyətli mətbuat orqanlarında çalışan əməkdaşlara diqqət və qayğısından, bu ənənənin cənab Prezident İlham Əliyevin davam etdirməsindən, jurnalistika ənənələrinin yaşadılmasında Həsənağa Əliyevin fədəkar rolundan, rayonun ictimai həyatında fəal iştirakından bəhs ediblər. Tədbirin gedişində yubliyara çoxsaylı “Fəxri Fərman” və hədiyyələr təqdim olunub.
Keçidlər
