“Heydər Əliyev irsinin öyrənilməsi” - Masallı şəhər 6 saylı tam orta məktəbi

   Aprelin 19-da Masallı rayon Mərkəzi Kitabxanasında Rayon İcra Hakimiyyətinin təşəbbüsü, Mərkəzi Kitabxananın və Masallı Təhsil Sektorunun birgə təşkilatçılığı ilə Heydər Əliyev irsinin öyrənilməsi mövzusunda növbəti tədbir keçirilib.

   Tədbirdə Ramiz Cəfərov adına Masallı şəhər 6 saylı tam orta məktəbin Vll, Vlll, lX və X sinif şagirdləri iştirak ediblər. Əvvəlcə ümummilli lider Heydər Əliyevin və şəhidlərin əziz xatirəsi bir dəqiqəlik sükutla yad olunub.

   Tədbirdə ilk çıxış edən kitabxana əməkdaşı Şəmsurə Nəsirova bildirib ki, Azərbaycan xalqının ümummilli lideri Heydər Əliyev öz mənalı və zəngin ömrünü bütövlükdə millətinə, xalqına, vətəninə və dövlətinə həsr etmişdir. Millətini canından artıq sevən ulu öndərə olan sonsuz xalq məhəbbətinin sirri də məhz elə budur.

   Sonra məruzə ilə çıxış edən kitabxananın digər əməkdaşı Rasif Dadaşov diqqətə çatdırıb ki, ümimmilli lider Heydər Əliyevə tükənməz millət sevgisinin nəticəsidir ki, müstəsna xidmətləri ilə Azərbaycanın taleyində misilsiz rolu olan, müasir dövlətimizin memarı, ölkəmizi sürətli inkişaf yoluna çıxarmaqla dünya birliyinə qovuşdurmuş dünya şöhrətli siyasətçi-Heydər Əliyevin doğum günü hər il respublikamızda, eləcə də onun hüdudlarından çox-çox uzaqlarda böyük təntənə ilə qeyd olunur, əbədiyaşar liderimizin parlaq xatirəsi dərin ehtiramla yad edilir. Sonda tədbirdə iştirak edən məktəb şagirdləri kitabxana fondunun tərkibi və sərgilər ilə tanış olublar.