Masallı Gənclər Evində Novruz şənliyi

16 mart 2023-cü il tarixində “Masallı Gənclər Evi” sosial xidmət müəssisəsində Novruz şənliyi keçirilib.

“Masallı Gənclər Evi” sosial xidmət müəssisəsinin təşkilatçılığı, Masallı rayon Gənclər və İdman İdarəsinin, Masallı Regional Mədəniyyət İdarəsinin rəhbərliyi və kollektivi və Ombudsmanın Cənub Regional Mərkəzinin birgə iştirakı ilə Milli ruhumuzu və yaddaşımızı bütün zənginliyi ilə özündə əks etdirən Novruz şənliyi keçirilib.

Novruz şənliyini giriş sözü ilə açan “Masallı Gənclər Evi” sosial xidmət müəssisəsinin direktoru Fuad Mənsimov iştirakçıları xeyirxahlıq və mehribanlıq kimi gözəl hissləri özündə əks etdirən Novruz bayramı münasibətilə təbrik etmiş, xalqımıza firavanlıq, ölkəmizə sülh və əmin-amanlıq arzulayıbdır. Daha sonra novruz şənliyində Masallı rayon Gənclər və İdman İdarəsinin rəisi Sabiq Cahangirov, Masallı Regional Mədəniyyət İdarəsinin rəisi Bəxtiyar Qılıncov, Ombudsmanın Cənub Regional Mərkəzinin rəhbəri Ziya İsmayılov, Masallı rayon Tarix-Diyarşünaslıq Muzeyinin direktoru Əntiqə Tağıyeva və QRM-nin əməkdaşı Nərgiz Muxtarova çıxışlarında iştirakçılara novruz bayramı münasibətilə təbriklərini çatdırıblar.

Novruzun əsas personajları olan Kosa və Keçəlin bir-birindən maraqlı çıxışları, uşaq bağçalarının balaca sakinləri tərəfindən təqdim olunan bayram əhval-ruhiyyəli səhnəciklər, səsləndirilən şeirlər, Yusif Əzizlinin təqdimatında Xudayar təsnifi, yumurta döyüşləri, Azərbaycanı tərənnüm edən mahnılar şənliyə xüsusi rəng qatmışdır. Sonda Masallı rayon Qadın Resurs Mərkəzinin üzvləri tərəfindən eko çantaların üzərinə rəngli boyalarla şəkillər çəkərək iştirakçılara hədiyyə ediblər.