Masallıda Ərkivan qəsəbə 5 saylı ümumi orta məktəbdə gedən təmir işlərinə yerində baxış

Masallı Rayon İcra hakimiyyəti başçısı Araz Əhmədov, Elm və Təhsil Nazirliyinin insan resursları şöbəsinin müdiri Çapay Məmmədov, Lənkəran-Astara Regional Təhsil İdarəsinin müdiri Bəhruz Mehdiyev, Masallı Təhsil sektorunun müdiri Qoşqar Hətəmov və digər rəsmilər təhsil müəssisəsini ziyarət edərək görülən işlərlə yerində tanış olmuşlar.

Tədbirdə görülən işlərlə bağlı məlumat verən qəsəbə sakini, xeyriyyəçiləri təmsil edən Cəfər Cəfərov qeyd etmişdir ki, Masallı rayonunun Ərkivan qəsəbə  5 saylı ümumi orta məktəb 1928-ci ildə inşa edilmişdir. Məktəb binası üç korpusdan ibarət olub, zamanla müəyyən dərəcədə köhnəlmişdir. Hazırda Ərkivan qəsəbəsinin xeyriyyəçiləri tərəfindən yeni tədris ilinin başlanması ərəfəsində şagirdlərin daha səliqəli, təmirli tədris ocağında təhsil almaları üçün məktəbin 10 sinif otağında əsaslı təmir tikinti işləri aparılır.

Ölkəmizdə təhsilə verilən dəyər və göstərilən diqqət bu kimi nümunələrlə özünü aydın şəkildə göstərir. Təhsilin keyfiyyətini artırmaq, gənclərə müasir standartlara uyğun tədris mühitini təmin etmək məqsədilə dövlət və vətəndaşlar birgə səylər göstərirlər. Son illərdə həyata keçirilən müxtəlif dövlət proqramları, təhsil müəssisələrinin maddi-texniki bazasının yaxşılaşdırılması, müəllimlərin bilik və bacarıqlarının artırılması, eyni zamanda tədris prosesinin rəqəmsallaşdırılması bu sahədə olan irəliləyişləri nümayiş etdirir. Bu istiqamətdə həyata keçirilən tədbirlər, həmçinin millətin gələcəyi üçün təhsilin əsas prioritet olduğunu bir daha təsdiqləyir.

Masallı rayonunun Ərkivan qəsəbəsində yerləşən məktəbin təmirində də bu cür işlərin həyata keçirilməsi və ictimaiyyətin təhsilə göstərdiyi dəstək, ölkəmizin təhsil sistemindəki inkişafın bir göstəricisidir. Gələcəyin vətənpərvər, bilikli və savadlı nəsillərini yetişdirmək məqsədilə görülən bu işlər Azərbaycanın tərəqqisinə xidmət edir.