Masallıda idman ictimaiyyətinin nümayəndələrilə görüş keçirilib
Masalllı rayonunda bir qrup idman ictimaiyyətinin nümayəndəsi ilə görüş keçirilib.
Tədbir iştirakçıları əvvəlcə Ümummilli lider Heydər Əliyevin abidəsini və Qəhrəmanlar Parkında “Şəhidlər” abidə-kompleksini ziyarət ediblər.
Lənkəran-Astara Regional Gənclər və İdman İdarəsinin (LARGİİ) fəaliyyət planının hazırlanması ilə əlaqədar təşkil olunan görüş Heydər Əliyev Mərkəzində davam edib.
Tədbirdə Lənkəran-Astara Regional Gənclər və İdman İdarəsinin rəisi Teymur Babazadə, idman sektorunun əməkdaşı Yusif Xamıyev, LARGİİ-nin Masallı rayonu üzrə sektor müdiri Sabiq Cahangirov, “Masallı Gənclər Evi” SXM-nin direktoru Fuad Mənsimov, Azərbaycan İdman Jurnalistləri Assosiasiyasının Lənkəran-Astara bölgəsi üzrə koordinatoru Akif Ağayev, beynəlxalq və respublika yarışlarında yüksək nailiyyətlər əldə etmiş bir qrup idmançı və məşqçi-müəllimlər iştirak ediblər.
Görüş zamanı Azərbaycan Milli Olimpiya Komitəsinin prezidenti, Ölkə rəhbəri İlham Əliyevin idmana olan tükənməz qayğısı sayəsində respublikada gənclər-idman siyasətinin inkişafı istiqamətində atılan addımlardan, regionlarda idmanın kütləviliyinə nail olmaqdan ötrü qarşıda duran vəzifələrdən bəhs edilib, idman məktəbləri, klub, zal və stadionların fəailiyyəti, idman avadanlıqları ilə təminat, əhali arasında idmanın təşviqi, “Heydər Əliyev İli” çərçivəsində tədbirlərin, eləcə də müxtəlif idman növləri üzrə yarışların, narkomaniya və digər zərərli vərdişlərin profilaktikası üzrə və digər sosialyönümlü layihələrin həyata keçirilməsi və s. məsələlər müzakirə olunub, məşqçilərin fikir və təklifləri dinlənilib.
Maraqlı diskusiya şəklində keçən görüşdə idmançılarımızın bundan sonra da beynəlxalq yarışlarda uğurla çıxış edəcəklərinə əminlik ifadə olunub.
Əlavə edək ki, Lənkəran-Astara Regional Gənclər və İdman İdarəsinin rəisi Teymur Babazadə gün ərzində Masallı Rayon İcra Hakimiyyətinin başçısı Araz Əhmədovla görüşüb, Masallı Olimpiya-İdman Kompleksi, Masallı Regional Boks və Taekvondo Mərkəzləri, Boradigah İdman Zalı, “Viləş” minifutbol meydançası, “Masallı Gənclər Evi” SXM-dəki şəraitlə tanış olub, Masallı “Asan İntellektual İnkişaf Mərkəzi”ndə Gənclər və İdman Nazirliyinin yaradılmasının ildönümü ilə bağlı gənclər arasında təşkil olunan “Breyn rinq” bilik yarışı üzrə rayon birinciliyinin mükafatlandırma mərasimində iştirak edib.
Rayonda fəaliyyət göstərən gənclər təşkilatları və fəal gənclərlə görüş zamanı İdarə rəisi Teymur Babazadə, Gənclər sektorunun əməkdaşı Elnurə Qəniyeva, “Regional İnkişaf” İB-nin Cənub Regionunun rəhbəri İlkin Muradov gənclər siyasəti, gənclərin inkişafında təşkilatların rolu, könüllülük fəaliyyəti və s. məsələlərdən danışıb, gənclərin təkliflərini dinləyib, suallarını cavablandırıblar.
