Masallıda şəhidlərin xatirəsinə həsr edilən cüdo turniri
Turnir Ümummilli lider Heydər Əliyevin 100 illik yubileyi və 26 iyun – Azərbaycanın Silahlı Qüvvələri Günü ilə əlaqədar olaraq Azərbaycan Respublikasının ərazi bütövlüyü uğrunda gedən döyüşlərdə şəhidlik zirvəsinə ucalan Masallının şəhid cüdoçularının xatirəsinə həsr olunub.
Uşaq və Yeniyetmələr arasında keçirilən cüdo idman növü üzrə Masallı rayon Açıq turniri Azərbaycan Respublikasının Gənclər və İdman Nazirliyi, Masallı Rayon Gənclər və İdman idarəsinin təşkilatçılığı, Azərbaycan Cüdo Federasiyasının və Masallı Rayon İcra Hakimiyyətinin dəstəyi, “Masallı Elektroniks” şirkətlər qrupunun sponsorluğu, “Asiya.az” xəbər portalının media dəstəyi ilə baş tutub.
Turnirdə Masallı Rayon İcra Hakimiyyətinin başçısı Araz Əhmədov, Hüquq mühafizə orqanları, idarə, müəssisə və təşkilat rəhbərləri, şəhid ailələri, qazilər və rayon ictimaiyyətini iştirak ediblər.
Tədbir iştirakçıları öncə Masallı Olimpiya Kompleksinin foyesində Masallı Diyarşünaslıq Muzeyində və şəhidlərimizin ev muzeylərində qorunub saxlanılan şəhidlərimizin şəxsi əşyalarının, eləcə də rayonun yeniyetmə və gənc rəssamların vətənpərvərlik mövzusunda çəkdikləri rəsm əsərlərinin sərgisinə baxıblar.
Turnir Ulu öndər Heydər Əliyev və vətənimizin ərazi bütövlüyümüz uğrunda həlak olan şəhidlərimizin ruhunun bir dəqiqəlik sükutu və Dövlət himnimizin sədaları ilə başlayıb.
Tədbirin aparıcısı jurnalist Cəfər Cəfərov turnirin keçirilməsi barədə iştirakçılara geniş məlumat verərək ilk sözü Masallı Rayon İcra Hakimiyyətinin başçısı Araz Əhmədova verib.
İcra başçısı tədbir iştirakçılarını və idmançıları salamlayaraq, onları 26 iyun – Azərbaycanın Silahlı Qüvvələri Günü münasibətilə təbrik edib.
O, qeyd edib ki, Uşaq və Yeniyetmələr arasında cüdo idman növü üzrə Masallı rayon Açıq turnirinin keçirilməsi bu idman növünün uşaq və yeniyetmələr arasında təbliği, prespektivli idmançıların üzə çıxarılması, Uşaqlar və yeniyetmələrin asudə vaxtının səmərəli təşkil olunması, onlara vətənpərvərlik ruhunun aşılanması, zərərli vərdişlərdən uzaqlaşdırılması, idmançılar arasında dostluq əlaqələrinin möhkəmləndirilməsi və ən əsası ərazi bütövlüyümüz uğrunda canlarını fəda etmiş qəhrəman şəhidlərimizin xatirəsini əbədiləşdirilməsində böyük rolu vardır.
Çıxış edən ikiqat Parolimpiya Oyunları çempionu, üçqat dünya, səkkizqat avropa çempionu, 2015 Avropa Oyunları çempionu, Əməkdar idman ustası, Əməkdar məşqçi, Qarabağ müharibəsi qazisi, “Şöhrət” ordenli İlham Zəkiyev yeniyetmə idmançıları təbrik edib, son illər cüdo idman növünə marağın artdığını qeyd edib.
Şəhid ailələri adından çıxış edən “Aprel döyüşləri” şəhidi Nurlan Əsgərli və Vətən Müharibəsi Qəhrəmanı İntiqam Əsgərlinin anası Ziba Əsgərli tədbirin təşkilatçılarına, şəhid ailələrinə qayğıya görə ölkə başçısı İlham Əliyev və Birinci Vitse-prezident Mehriban Əliyevaya minnətdarlığını bildirib.
Sonra idmançıları cənub bölgəsinin incisi “Halay” folklor və “Masallı” rəqs qrupları öz rəqs nömrələri ilə təbrik ediblər.
Masallı Xalq Teatrı Cəfər Cəfərovun eyniadlı pyesi əsasında səhnələşdirdiyi “Şuşa ətrin duyulur” tamaşasından “Şuşanın azad edilməsi” səhnəsini nümayiş ediblər. Döyüş səhnəsini Masallıdan olan peşəkar idmançılar və Vətən müharibəsi qaziləri canlandırıb.
Final yarışlarından sonra fəxri qonaqların və idmançıların mükafatlandırma mərasimi keçirilib.
Qeyd edək ki, Beynəlxalq Cüdo Fedrasiyasının təsdiq etdiyi qaydalar əsasında keçirilən yarışda 2009-2010, 2011-2012 və 2013-2014-cü il təvəllüdlü idmançılar 38, 42, 46, 50, 66 kq (2009-2010), 30, 38, 42 kq (2011-2012), 27, 34, 42 kq (2013-2014) çəki dərəcəsində öz qüvvəsini sınayıb.
