Masallıda YAP-ın yaradılmasının 30-cu ildönümü qeyd olunub
Oktyabrın 26-da Yeni Azərbaycan Partiyası (YAP) Masallı rayon təşkilatı partiyanın yaradılmasının 30-cu ildönümünə həsr edilmiş tədbir keçirib.
Əvvəlcə tədbir iştirakçıları xalqımızın ümummilli lideri Heydər Əliyevin abidəsini ziyarət edib, önünə tər güllər düzərək xatirəsinə ehtiramlarını bildiriblər. Sonra Masallı Qəhrəmanlar Parkında ölkəmizin ərazi bütövlüyü uğrunda canlarını qurban vermiş şəhidlərimizin xatirəsi ehtiramla yad edilib.
Tədbir Azərbaycan Respublikasının Dövlət Himninin səsləndirilməsi ilə başlayıb. Ulu öndər Heydər Əliyevin və Azərbaycanın müstəqilliyi, suverenliyi, ərazi bütövlüyü uğrunda şəhid olmuş qəhrəmanlarımızın əziz xatirəsi bir dəqiqəlik sükutla yad edilib.
Sonra Yeni Azərbaycan Partiyasının yaradılmasının 30 illiyinə həsr edilmiş videoçarx nümayiş olunub.
YAP Masallı rayon təşkilatının sədri Seyfəddin Əliyev xalqımızın ümummilli lideri Heydər Əliyevin qurucusu olduğu Yeni Azərbaycan Partiyasının 30 il ərzində şərəfli yol keçdiyini, ümumxalq partiyasına çevrildiyini diqqətə çatdırıb. O, YAP-ın qələbələr partiyası kimi Azərbaycana tarixi nailiyyətlər qazandırdığını qeyd edib.
Tədbirdə şəhər 1 saylı tam orta məktəb ərazi partiya təşkilatının sədri, şəhid Niyaməddin Sultanzadənin anası Mehriban Sultanova çıxış edərək qeyd edib ki, 30 illik yubileyə Yeni Azərbaycan Partiyası zəfər qazanmış bir ölkənin hakim partiyası olaraq daxil olur. O, Heydər Əliyev ideyalarının əbədiyaşar olduğunu, ölkəmizin Prezident İlham Əliyevin rəhbərliyi ilə uğurla inkişaf etdiyini söyləyib.
YAP Masallı rayon təşkilatının veteran üzvü, Ziyalılar Cəmiyyətinin sədri Qardaş Fətullayev çıxışında bildirib ki, ulu öndər Heydər Əliyev hakimiyyətə qayıdışı ilə Azərbaycana sabitlik və tərəqqi gətirdi. Bu gün Azərbaycan qüdrətli və qalib dövlət kimi dünya birliyində söz sahibinə çevrilib.
YAP Masallı rayon təşkilatının gənc fəalı İradə İmanbəyli diqqətə çatdırıb ki, bu gün sürətlə inkişaf edən müstəqil dövlətimiz Yeni Azərbaycan Partiyasının Sədri, Prezident İlham Əliyevin uğurlu siyasəti ilə regionun lider dövlətinə çevrilib. İ.İmanbəyli, eyni zamanda, ölkəmizdə gənclərə göstərilən diqqət və qayğıdan ətraflı bəhs edib.
Tədbirdə YAP İdarə Heyətinin üzvü, Milli Məclisin deputatı Anar İsgəndərov da çıxış edərək ümummilli lider Heydər Əliyevin ideyaları, uzaqgörənliyi və qətiyyəti nəticəsində yaradılan YAP-ın 30 illik tarixinin zəngin və şərəfli inkişaf yolu olduğunu söyləyib. Deyib ki, Azərbaycanın ən güclü və mütəşəkkil siyasi qüvvəsi olan Yeni Azərbaycan Partiyası bu gün Prezident İlham Əliyevin sədrliyi ilə xalqımızı uğurlara, qələbələrə aparır.
Milli Məclisin deputatı Məşhur Məmmədov çıxışında Heydər Əliyev ideyalarının böyük zəfərlərə yol açdığını söyləyib. O, Prezident İlham Əliyevin rəhbərliyi ilə Azərbaycanın tarixi nailiyyətlər qazandığını, möhtəşəm Qələbəyə imza atmaqla tarix yazdığını qeyd edib. M.Məmmədov Yeni Azərbaycan Partiyasının bundan sonra da ardıcıl uğurlar qazanacağına əminliyini ifadə edib.
Masallı rayon İcra hakimiyyətinin başçısı Araz Əhmədov çıxışında YAP-ın qələbələr partiyası olduğunu diqqətə çatdırıb. O qeyd edib ki, Azərbaycan dövləti Prezident İlham Əliyevin rəhbərliyi ilə Vətən müharibəsində qazanılan Qələbə ilə şanlı tarix yazıb. Qüdrətli dövlətimiz özünün ən böyük məramını gerçəkləşdirib, ölkəmizin ərazi bütövlüyü təmin edilib.
Sonra partiyanın və rayon təşkilatının ictimai-siyasi həyatında fəal iştirakına görə bir qrup şəxs Fəxri fərmanla təltif olunub.
Sonda Yeni Azərbaycan Partiyası sıralarına yeni qəbul olunmuş şəxslərə üzvlük vəsiqələri təqdim edilib.
