Polis Akademiyasına qəbul üçün müraciət edən abituriyentlər və onların valideynləri ilə görüş
Masallı Rayon Polis Şöbəsində DİN-in Polis Akademiyasına qəbul üçün müraciət edən abituriyentlər və onların valideynləri ilə görüş keçirilib.
Görüşdə çıxış edən Masallı RPŞ-nin rəisi, polis polkovniki Azay Ağayev, Polis Akademiyasının əməkdaşı, polis leytenantı Fəxrəddin Cəfərov bildiriblər ki, sağlam cəmiyyətin formalaşması və ölkəmizin işıqlı gələcəyi məhz təhsilli, sağlam gənclikdən asılıdır. Ali təhsil müəssisələrinə hazırlaşan, daxili işlər orqanlarında xidmət etmək həvəsində olan abituriyentlərə Polis Akademiyasına kursant qəbulu qaydaları ilə bağlı ətraflı məlumatlar verilib. Akademiyanın ölkəmizdə savadlı kadrların yetişməsində, daxili işlər orqanlarının hüquqşünaslarla təmin olunmasında mühüm rol oynadığı diqqətə çatdırılıb. Burada gənclərimizin hərtərəfli inkişafı üçün yaradılan müasir şərait, zəngin kitabxana, xarici dil öyrənmək imkanı, laboratoriyalar, yataqxana və asudə vaxtın səmərəli təşkili məqsədilə yaradılan şəraitdən danışılıb.
Qocaman təhsil müəssisəsindəki tədris prosesinə, kursantların hazırlığına həsr edilmiş videoçarx nümayiş olunub, abituriyentlərin və valideynlərin sualları cavablandırılıb.
