“Zəfərə gedən yol” adlı tədbir
Masallı Rayon İcra Hakimiyyəti Masallı Tarix-Diyarşünaslıq Muzeyi və Masallı Dövlət Regional Kollecin birgə təşkilatçılığı ilə Aprel döyüşlərinin 8-ci ildönümünə həsr olunan “Zəfərə gedən yol” adlı tədbir keçirildi. Muzeydə keçirilən tədbirdə təşkilatçı müəssisələrin əməkdaşları, şəhid ailələri, Vətən müharibəsi iştirakçıları, media nümayəndələri və gənclər iştirak etdi.
İlk öncə vətənin azadlığı və bütövlüyü uğrunda canından keçən şəhidlərin əziz xatirəsi dərin hüznlə yad edildi.
Tədbiri giriş sözü ilə açan muzeyin direktoru Əntiqə Tağıyeva Azərbaycan ordusunun qələbəsi ilə bitən aprel 2016-cı il dördgünlük müharibədə qəhrəman əsgər, gizir və zabitlərin təcavüzkar Ermənistan ordusuna cavab olaraq ağır zərbələr endirərək 2 min hektardan artıq ərazini işğaldan azad etməklərindən danışdı.
Sonra Lənkəran-Astara Regional Mədəniyyət İdarəsi Masallı rayon üzrə nümayəndəsi Salman Yunusov, Masallı rayon İcra Hakimiyyətinin Vətən müharibə iştirakçıları ailələri ilə işin təşkili şöbəsinin baş məsləhətçisi Nurlan Muradov , Kollecin direktor müavini Dilarə Hüseynova, “Yeni həyat” qəzetinin əməkdaşı Akif Ağayev çıxış edərək Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin prinsipial, qətiyyətli siyasəti sayəsində Azərbaycanın ordusunun Qarabağ ərazisində ardıcıl şəkildə qazandığı uğurlar, bu gün tarixin ən şanlı mərhələsini yaşayan Azərbaycan Ordusunun həyata keçirdiyi əks-həmlə əməliyyatı - Aprel döyüşləri Azərbaycan dövləti və xalqı üçün Vətən müharibəsindəki Böyük Qələbənin başlanğıcı kimi xatırlanacağını xüsusi qeyd etmiş oldular.
Daha sonra şəhid atası Qismət Məlikov övladından və Vətən müharibəsi iştirakçıları, hərbiçi Nazim Cəfərov , Bəhruz Mehbaliyev Aprel döyüşləri zamanı ordumuzun imkanlarının cüzi bir faizini nümayiş etdirdikləri, səbr edərək bizə aid olanı geri qaytarmaq üçün nə etmək lazımidirsə , 44 günlük müharibədə onu da mərdliklə etdiklərindən danışdılar.
Tədbirin yekununda iştirakçılar Masallı Regional Kollecin tələbələrinin ifasında kompozisiyaya baxdıqdan sonra muzeydə Aprel döyüşlərində qəhrəmanlıq göstərən şəhidlərə həsr olunan sərgi ilə də tanış oldular.
